alternatetext Багымдат: 06:20 | alternatetextКүн чыгуу: 07:52 | alternatetext Бешим: 13:18 | alternatetextАср: 16:58 | alternatetextШам: 18:43 | alternatetextКуптан: 20:17
МакалаларРубрикасыз

Атамбаев диний ишмерлердин саясатка кийлигишүүсүнө жол бербөө керектигин айтты

Атамбаев Кыргызстанда дин тутуу эркиндиги жана аларды ишке ашыруу үчүн бардык мүмкүнчүлүктөр бар экенин баса белгиледи.

Мамлекеттин светтик мүнөзүнүн конституциялык принциптерин бузууга жол берилбейт. Бул тууралуу президент Алмазбек Атамбаев депутат Жанар Акаевди, муфтий Максат ажы Токтомушевди, Аалымдар кеңешинин төрагасы Абдышүкүр Нарматовду, журналист Алия Суранованы жана көз карандысыз эксперт Нурлан Исмаиловду кабыл алуу учурунда билдирди.

Атамбаев Кыргызстанда дин тутуу эркиндиги жана аларды ишке ашыруу үчүн бардык мүмкүнчүлүктөр бар экенин баса белгиледи.

Белгилей кетсек, намаз окуу үчүн түштөнүү убактысын узартуу боюнча көтөрүлгөн демилгенин айланасында интернет колдонуучулар жана коом арасында катуу талкуу жаралган.

«Мусулмандар башка конфессиянын өкүлдөрү сыяктуу эле эркин дин тута алат. Аларды жума намазына киргизбей койду деп арыз менен кайрылган бир дагы учур Кыргызстанда катталган эмес», — деди ал.

Президент ошондой эле кандай гана мекеме, ишкана болбосун, алардын башчылары жекелик түрдө ар бир кызматкердин диний ишенимдери талап кылган жөрөлгөлөрдү кылууга уруксат бериши керек экенин билдирди.

Атамбаев ошондой эле бардык нерсенин чеги болушу керектигин айтып, диний догманы ээрчиген бир катар араб мамлекеттериндеги абал кандай болгонун бардыгы көрүп турганын билдирди. Андыктан мындай чакырыктар «Ислам мамлекетине» болгон багыт экенин кошумчалады.

Ошондой эле бай тарыхы, маданияты жана салты болгон улут катары кыргыз эли маңкурт болууга укугу жок экенин жана сырттан таңууланган жашоо образына, дүйнө таанымга арбалбоого чакырды.

«Мамлекеттин светтик мүнөзүнүн конституциялык принциптерин бузууга жол берилбеши керек деп эсептейм. Биздин өлкөдө ар бир жаран өзүнүн оюн ачык айтканга укуктуу, бирок дин ишмерлеринин саясатка кийлигишүүсүнө жол бербөө керек. Диний сабырсыздыкка чакырык жасоону да болтурбаш керек», — деди Атамбаев.

Мындай талашып-тартышуулар өзгөчө орозо айында болгону туура эмес экенин өлкө башчысы баса белгиледи.

Sputnik Кыргызстан

Бул да кызыктуу

Пикир калтыруу

Ой-пикириңизди жазыңыз Обязательные поля помечены *

This site uses Akismet to reduce spam. Learn how your comment data is processed.

Back to top button