Орозо кармоо тартиби: эмнеге уруксат берилип эмнеге тыюу салынат

Орозо кармаган жаран шилекей жутса болобу?
— Ооба, болот. Шилекей жутса орозо бузулбайт.

— Тиш тазалоого уруксат берилгенби? Тиш паста пайдаланылабы?
— Тиш паста эмес, мисвак (дарактан атайын тиш тазалоо үчүн алынган бутак — ред.) менен тазалаш керек. Тиш пастасы менен жууганга болбойт. Пастасы жок тиш щетка менен тазалоого уруксат.

— Уктап калып убагында ооз жаппай калса эмне болот?
— Эч нерсе болбойт. Турганда эч нерсе жебестен, ниет кылып, ооз жапса жарай берет.

— Эрте ооз жаап, кечирээк ооз ачса болобу?

— Эрте ооз жапса боло берет. Мисалга саат 01:00дө жаап уктай берсе болот. Бирок убагында ачканга аракет кылыш керек. Эгер шарт болбосо, анда айла жок.

— Ооруп саарлыкта айыгып кеткен киши орозо кармашы керекпи?
— Ооба, өзүн жакшы сезсе кармашы керек. Эгер күмөнсүсө, толук сакайганга чейин кармабай турганы дурус. Орозо ден-соолукка зыян тийгизбеши керек.

— Саарлык тамакты ичүү зарылбы?
— Ооба. Пайгамбарыбыз Мухаммед (САВ) сөзсүз түрдө саарлык тамак ичүү керектигин айткан. Андыктан саарлыкты калтырбаш керек.

— Орозо кармаган киши жол жүрө турган болсо оозун ачып алса болобу?
— Сапары узак болуп, орозонун айынан кыйнала турган болсо орозо кармабаганга уруксат берилет. Бирок сапардан келгенден кийин каза болгон орозолорун кармап коюшу керек.

— Орозо убагында сууга түшүүгө болобу?
— Болот. Бассейинге, душка чайынууга уруксат. Башты салып, кадимкидей эле чөмүлө берсе болот. Болгону кулак, мурунга суу кирип кетпеши керек. Мындан сырткары, эркектер сууга түшкөн жерде аялдар болбошу кажет.

— Ыктыярсыз же мажбур кусса орозо бузулабы?
— Жок, андай учурда орозо бузулбайт. Эгер адам кускандан кийин өзүн жакшы сезип, орозо кармоону улантып кетүүгө чамасы жетсе улантып орозо кармай берсе болот. Эгер атайылап кусса орозо бузулат.

— Ооз чайкаса болобу?
— Ооба, чайкаганга уруксат. Болгону жутуп жибербеш керек.

— Унутуп тамак жеп алса, тамеки тартып алса, суу ичип алса орозо бузулабы?
— Бузулбайт. Оозду чайкап алып, орозону уланта берсе болот.

— Рамазандан калган казасын кармаганча кийинки Рамазан айы келип калса эмне кылат?
— Келип калган орозону кармап бүткөн соң каза болгон орозо кармалат.

— Рамазандан башка айларда да орозо кармаса болобу?
— Болот. Сүннөт орозолорду кармап, сооп тапса болот.

— Бала эмгизип орозо тутса болобу?
— Эгер бала эмгизип жаткан эне өзүн жакшы сезсе, балага зыяны тийбесе орозо кармаса болот. Негизи боюнда бар аялдар, этек кири келип жаткан кыз-келиндер, эмчек эмизген энелер, оорукчан адамдар орозодон бошотулат.

— Орозо кармаганда өбүшүп учурашууга болобу?
— Албетте, болот. Балдарды бетинен өөп, башынан сылап эркелетсе болот. Чоңдор менен да өбүшүп учурашууга уруксат берилет. Болгону, чектен ашып кетпеш керек.

— Кош бойлуулар орозо кармаса болобу?
— Балага, ден-соолугуна залакасы тийбесе кармай берсин.

— Орозо учурунда тиш доктурга барса болобу?
— Орозонун адамга эч зыяны тийбеши керек. Эгер тиш ооруса албетте, дарыланышы керек. Болгону дарылоо учурунда суюктук кекиртектен ары кетпеши керек.

— Орозо учурунда денеден, ооздон кан, ириң акса орозо бузулабы?
— Бузулбайт. Эгер адам оорууга чалдыкса оозун ачууга уруксат. Кийин сакайган соң, карызын кармап коет.

— Орозо учурунда жубайлар жыныстык катнашка барса болобу?

— Ооз жабык учурунда болбойт. Эгерде кошулуп алса ооз ачылган болуп саналат. Бул үчүн орозо бүткөндөн кийин 60 күн тынбай кармоого туура келет. Жубайлар ооз ачылгандан тартып ооз бекиткенге чейин жыныстык катнашка барса уруксат.

— Тилдин, көздүн, ооздун орозосу жөнүндө айтып берсеңиз…
— Орозо бир гана ашказандыкы эмес. Тилдин, көздүн, кулактын орозосу болот. Бул ушак сөздөн, бирөөнү жамандоодон, арам оокаттан, башкаларды капа кылуудан арылуу деген сөз. Көздүн орозосу ыплас нерселерди кароодон тыят.

— Орозо учурунда ийне сайдырса ооз ачылабы?

— Ооба. Ийне сайдырып, дары ичүүгө болбойт. Эгер абал оорлоп бара жатса ооз ачып эле ден-соолукту чыңдоо зарыл.

?‍?‍?‍? БАКТЫЛУУЛУК ФОРМУЛАСЫ