КРдин Стратегиялык изилдөөлөр жана божомолдоо институтунун эксперти Аман Салиев Жакынкы Чыгыштагы террордук уюм ДАИШ, ИГИЛ же ИГИШ деп аталабы, башкысы анын келип чыгуусу маанилүү экенин белгиледи.
Ал өз сөзүндө террордук уюмга “Ислам мамлекети” терминин колдонуу этикага туура келбей турганын айтты.
“Анткени бул уюмдун түптөлүшүнө ислам илиминин жана мусулман аалымдарынын эч кандай тийиштиги да жок. Бул уюмдун аталышы жана түзүлүшү геосаясый кармаштын натыйжасында келип чыккан. Ошондой эле Жакынкы Чыгыштагы аймактарды бөлүп, ага таасир кылуу үчүн түзүлгөн деп айтууга болот”, — дейт ал.
“Ислам мамлекети” деген сөз классикалык исламда жана шариат боюнча таптакыр башка маанини берет. Мунун Ирак менен Сирияда болуп жаткан окуяларга эч кандай тиешеси жок”, — деди ал.
Аман Салиев буга чейин исламга байланыштырылып келген Аль-Каида, ИГИЛ жана башка террордук уюмдар мусулман аалымдар тарабынан түзүлбөгөнүн баса белгилеп, бул уюмдар геосаясий кармаштын натыйжасында түзүлгөнүн баса белгиледи.
“Аны керек болсо атайын кызматтар өздөрү түзгөн. Бул уюмдар мусулмандардын көз караштарын чагылдырбайт жана көздөбөйт”, — деди ал.
Белгилей кетсек, дүйнөлүк ири ЖМКлар Сирияда жана Иракта “Ислам мамлекети” деп аталган террордук уюмдун аталышын исламга байланыштырбай “ДАИШ” деп атоону сунуштап, согушкерлердин өз аракеттеринде исламдын атын колдонуусуна чек коюуну көздөп жатышат.
Sputnik Кыргызстан
December 02, 2015 at 08:04AM
