Пайгамбарыбыз (Ага Аллахтын салам-салаваты болсун) Табук согушуна жөнөдү. Сапар оор, жол узак болгонуна карабастан сахабалар согушка аттана башташты. Ошол учурда катуу ооруп, төшөккө жатып калган Муавия бин Муавия согушка аттана албай калды. Анын катуу ооруп жатканына күбө болгон Пайгамбарыбыз (Ага Аллахтын салам-салаваты болсун) анын үйдө калуусуна уруксат берди. Аллахтын жардамы менен мусулмандар Табукта жеңишке жетишти. Жеңиш менен мекенине кайткан Пайгамбарыбыз (Ага Аллахтын салам-салаваты болсун) сахабалары менен эс алуу үчүн жол боюна токтошту. Түн кирип, айлананы коюу караңгылык каптаган мезгилде, Жабрайил периште түшүп, Пайгамбарыбызга (Ага Аллахтын салам-салаваты болсун) кайрылып:
— Оо, Мухаммад, азыр туруп Муавияга кайып жаназасын оку — деди.
— Азыр окуюнбу?
— Ооба.
— Таң атуусун күтсөк болбойбу?
— Жок, оо, Аллахтын элчиси, чатырдын сыртында сени ар бир сабында жетимиш миңден болгон эки сап периштелер күтүп турат — деди Жабрайил, — алар буга чейин асмандан түшкөн эмес, качан гана Муавиянын кайтыш болгону асманга тараганда, сенин артыңда жаназа окуу үчүн Роббусунан уруксат сурашты.
— Оо, Жабрайил, мындай сыйга жетүү үчүн Муавия эмне кылды эле?
— Ал «Кул хувал-лооху ахад…» сүрөсүн жакшы көрөт эле жана «Аллахтын сыпаты болгондугу үчүн аны жакшы көрөмүн» деп айтчу.
Ушул түнү Пайгамбарыбыз (Ага Аллахтын салам-салаваты болсун) Жабрайил баштаган 140 000 периште менен Муавияга кайып жаназасын окуду.
Урматтуу окурман! Биз дагы Муавия сыяктуу Куран аяттарын сүйгөндү үйрөнөлү.
