Бир күнү халифа Абу Жафар Мансур (95-158/714-775) адаттагыдай сарайында отурат. Капыстан бир чымын учуп келип жүзүнө конот. Ал чымынды кагып жиберет. Ошентсе да чымын кайта айланып келип жүзүнө конот. Кайта кагып жиберет. Ушундайча чымын бир нече жолу жүзүнө конуп, тынчын алат. Халифа ыза болот. Эшиктин оозунда турган желдеттерге карап:
-Эшиктин алдына ким келди?- деп сурайт. Желдеттердин бири келип:
-Мукатил ибн Сулайман (Мукатил ибн Сулайман- аалым, тафсирчи, хижри 150-жылы дүйнөдөн кайткан) кирүүгө уруксат сурап жатат- деди. Халифа:
-Дароо алдыма киргизгиле!- дейт. Мукатил сарайга кирет. Халифа Мукатилди көрөөр замат:
-Аллах Таала чымынды эмне үчүн жаратканын билесиңби? -деп сурайт. Мукатил эч камырабастан:
-Аллах Таала чымынды өзүн кудуреттүүмүн деп санаган чоңдорду төбөсүнө түшүрү үчүн жаратты- деп жооп берет.
Абу Жафардын оозуна кум куюлуп, »а-б» деп үндөбөй калган экен.
Которгон: Нуриза Кармышакова,
атайын «Formula.kg» үчүн
