Айтылсын момундардын ой жакшысы,
Аллахтын бизге берген чоң бактысы,
Аллахтын саламы болсун дейлик
Адилдик, акыйкаттын жол башчысы.
Айтканың пайда, ар убак жанга ..йа Расулаллах
Сен болбосоң түз жолду билбейт элек ..йа Расулаллах
Сен болбосоң карарып кирдейт элек ..йа Расулаллах
Көрүнгөн отко ташка кулдук уруп,
Аллага башыбызды ийбейт элек ..йа Расулаллах
Арамдын деңизинде чабак уруп,
Аллахтын мыйзамында жүрбөйт элек ..йа Расулаллах
Асылдардын асылы элең, ..йа Расулаллах
Баатырлардын баатыры элең, ..йа Расулаллах
Мээримиңе мемиретип кубандырган,
Жетимдердин жакыны элең ..йа Расулаллах
Азап кайгы баарына сабыр кылган,
Акылмандын акылы элең ..йа Расулаллах
Туңгуюктан чыгарган, ал сен элең ..йа Расулаллах
Дилди иманга сугарган, ал сен элең ..йа Расулаллах
Аялзатка теңдик берген, ал сен элең ..йа Расулаллах
Көкүрөкө кеңдик берген, ал сен элең ..йа Расулаллах
Душмандарды кечирип азат кылган,
Айкөлдөрдүн айкөлү элең ..йа Расулаллах
Адашкандар багытын карманбадың ..йа Расулаллах
Ак-Жолуңдан чыгарууга акча дүйнө беришти, алданбадың ..йа Расулаллах
Үммөтүңдүн келечегин ойлоп ыйлап,
Бизчилеп бул өмүрдө шаңданбадың, ..йа Расулаллах
Аллага шүгүр кылып,
Сүйөм Сени, Сүйөм Сени Пайгамбарым,..йа Расулаллах
Сүннөтүңдү тирилткенге кантип жарайм, ..йа Расулаллах
Ибадат жок жаннатты кантип самайм, ..йа Расулаллах
Үммөт болуп үммөтчө иш кылдымбы,
Акыретте жүзүңдү кантип карайм, ..йа Расулаллах
Алланын атын айтып мактадымбы, ..йа Расулаллах
Адашып далай жолдо баспадымбы, ..йа Расулаллах
Энелердин буту алдында бейиш дедиң,
Энекемдин ак сүтүн актадымбы, ..йа Расулаллах
Сен көрбөгөн уйкуну биз уктадык, ..йа Расулаллах
Пайда кылып келбедик чымын чалып, ..йа Расулаллах
Сен өмүрдө каткырып күлдүң бекен,
Биз каткырып, акыретти ойлобостон
Жал дүйнөдө жабыр тартып кырсыктадык, ..йа Расулаллах
Адашкан жандар чыкты, аруубас арман чыкты
Унчукпадык йа Расулаллах
Сен айтканды толуктап аткарбадык, ..йа Расулаллах
Напсибизди токтотуп башкарбадык, ..йа Расулаллах
Бул заманда үммөтүңө баары турат,
Шүгүрчүлүк Жаратканга айталбадык, ..йа Расулаллах
Тамак десе тойо жеп курсак байлап,
Же сенчилеп бир жолу ач калбадык, ..йа Расулаллах
Жарты болуп жүрөктөр ууга батып,
Жамандыктан пенделерди кайтарбадык, ..йа Расулаллах
Жапыс туруп жасалма бийик болдук, ..йа Расулаллах
Мансап үчүн чуркаган күлүк болдук, ..йа Расулаллах
Күндү тоскон карарган булут болдук, ..йа Расулаллах
Күнөөлөрдү моюнга үйүп койдук, ..йа Расулаллах
Өлүк жандай пайдасыз тирик болдук, ..йа Расулаллах
Көздүү туруп көкүрөк көргө айланып,
Акыйкатты айтпаган дудук болдук, ..йа Расулаллах
Сен билгенди биз билгенде,
Күнү түнү дуба кылып ыйлаар элек ..йа Расулаллах
Сен билгенди биз билгенде,
Чеги менен жалганда жыргаар элек ..йа Расулаллах
Сен билгенди биз билгенде,
Саждада жаратканды мактаар элек ..йа Расулаллах
Сен билгенди биз билгенде,
Сүннөтүңдү тирилтип сактаар элек ..йа Расулаллах
Сен билгенди биз билгенде,
Арактын тамчысын да тартпайт элек ..йа Расулаллах
Сен билгенди биз билгенде,
Көкүрөктү түтүнгө чылап, чылым алып тартпайт элек ..йа Расулаллах
Сен билгенди биз билгенде,
Жаназага акча сурап, Алланын сөзүн сатпайт элек ..йа Расулаллах
Сен билгенди биз билгенде,
Ажылыкты наам кылып, ажымын деп мактанып айтпайт элек ..йа Расулаллах
Үммөттөрдүн ичинен чыкты жандар,
Динди кыска кылышып өлчөшкөндөр ..йа Расулаллах
Жихад дешип илими жок,
Аллах сөзүн өйдө ылдый өлчөшкөндөр ..йа Расулаллах
Сүннөтүңдүн сырын билбей,
Исламды чапан менен, сакал менен көргөзгөндөр .йа Расулаллах
Кийимде эмес жүрөктө, ыйман чегин билген барбы ..йа Расулаллах
Алланы да, мекенин да, динин дагы, элен дагы
Тилин дагы эч айныбай сүйгөн барбы ..йа Расулаллах
Жакшылыка чакырып, жамандыка күйгөн барбы ..йа Расулаллах
Сөзүм жетпейт, өзүмдүн да дүйнөм жарды ..йа Расулаллах
Бейиштин не экенин биз билгенде,
Байлыктан көп садага кылаар элек ..йа Расулаллах
Көр азабы, тозок эмне биз билгенде,
Түндөй болуп намазга тураар элек ..йа Расулаллах
Коркуудан напсибизди тыяр элек ..йа Расулаллах
Таттуу туруп уулаган балды кантем ..йа Расулаллах
Түнгө нурун чачпаган айды кантем ..йа Расулаллах
Намазы жок агарган таңды кантем ..йа Расулаллах
Улуу туруп балдарына акыл айтпас,
Арагынан башын тартпас чалды кантем ..йа Расулаллах
Айткандар жүрөктөргө сезилсин дейм ..йа Расулаллах
Мээримдүү Аллах бизди кечирсин дейм ..йа Расулаллах
Азал күнү ааламга угулсун дейм йа Расулаллах
Шапаатыңды Аллах бизге буюрсун дейм ..йа Расулаллах
Аллахты сүйгөнүмдөй жүрөгүмдөн
Сүйөм Сени, Сүйөм Сени, Сүйөм Сени,
Пайгамбарым, ..йа Расулаллах
САЛЛАЛЛОХУ АЛАЙХИ ВА САЛЛАМ!
