Кыргыз Республикасынын Дин иштери боюнча мамлекеттик комиссиясынын (КР ДИМК) директору Тойгонбай Абдыкаров Ташкентке болгон иш сапарында Өзбекстан Республикасынын Министрлер кабинетинин алдындагы Дин иштери боюнча комитетинин жетекчиси Содик Тошбоев менен жолугушту.
Жолугушууга Кыргызстан мусулмандарынын Азирети Муфтийи Замир кары Ракиев, Кыргызстан Ислам университетинин ректору Абдишүкүр Нарматов жана Өзбекстандын муфтийи Нуруддин ажы Халыкназаров катышты.
Эки тараптуу жолугушууда элдин ынтымагын бекемдөө, мамлекеттер ортосундагы достук алакаларды чыңдоо жана тажрыйба алмашуу, буга чейинки кол коюлган меморандумдарды ишке ашыруу боюнча пикир алышты.
«Ханафий мазхабы, Матурудий акыйдасын бекемдөөдө дал ушундай Борбор Азияга белгилүү болгон диний окуу жайлардан студенттерибиз билим алып, бул жаатта Муфтий менен сүйлөшүп, иш алып баруу кажет. Эң негизгиси калкыбызды ар кандай терс диний агымдардан оолак кылууда мыкты кадрларды даярдоо керек», -деп белгиледи КР ДИМК директору Тойгонбай Абдыкаров.
Ошондой эле, тараптар Дин Башкармалыктар ортосундагы алаканы бекемдөө, тажрыйба алмашуу менен салттуу ислам дининин асыл баалуулуктарын коомчулукка биргеликте жеткирүү экендигин талкуулашты.
